A historia do lugar de Ermelo, en Bueu, propiciou a súa consideración como o “cerne” do Morrazo. Esta contorna, que chegou a albergar un antigo mosteiro no século X, vén de ser rexenerada cunha serie de obras divididas en dúas fases. Os deputados provincias, Santos Héctor e Raquel Giráldez, visitaron esta mañá a zona, acompañados polo alcalde da vila, Félix Juncal, e o concelleiro de Urbanismo, Martín Villanueva. Os representantes públicos percorreron os diferentes camiños nos que se actuou.
As obras
As melloras realizadas dividíronse en dúas fases, tal e como informa o Concello. A primeira delas foi realizada no 2017 e supuxo o acondicionamento da praza pública, substituíndo o pavimento de asfalto por outro de mestura entre adoquín e enlousado de granito, así como soterrando os tendidos eléctricos. Tamén se instalaron unha serie de elementos como bancos.
A segunda intervención realizouse hai escasos meses e consistiu na pavimentación con granito da zona baixa da aldea, coñecida como o Camiño da Fonte, así como na zona alta, desde a igrexa ata o cruce de acceso á Esculca. Estas obras tiñan como obxectivo manter a esencia do pasado, reutilizándose lousas que apareceran no antigo camiño.
Ambas fases sumaron un investimento de aproximadamente máis de 200.000 euros, financiados a través de dous programas do Plan Concellos da Deputación. Esta entidade afirma que se trata dun proxecto que contribúe á recuperación do espazo público das persoas, fronte ao emprego do vehículo.
Para o goberno local, trátase dun dos proxectos “máis ilusionantes dos últimos anos”, para valorizar un espazo histórico. O alcalde apunta que tamén se renovaron servizos como o alumeado, o saneamento e o abastecemento. “Estamos moi satisfeitos co traballo feito e de como está a ser o resultado”, afirma.
Orixes
A contorna de Ermelo conta cunha gran importancia histórica, xa que albergou un mosteiro no século X. A igrexa do templo foi reedificada en 1104, tal e como sinala unha lousa interior, que á vez apunta ao arcebispo Xelmírez como restaurador. A construción actual é de 1774, de estilo barroco. Aínda así, consérvanse algúns restos da igrexa prerrománica previa á reedificación de 1104, como un modillón incrustado na parede da sancristía.