O Concello asina coa familia Davila o convenio para o desenvolvemento urbanístico do centro de Beluso

O desenvolvemento urbanístico do centro de Beluso xa está máis cerca. O salón de plenos do Concello de Bueu acolleu hoxe a sinatura do convenio urbanístico coa familia Davila de cesión dunha parcela no centro de Beluso, onde se sitúa actualmente o aparcadoiro público. Tanto o alcalde, Félix Juncal, como o edil de Urbanismo, Martín Villanueva, destacaron que se trata dun trámite moi necesario. “Permitirá que o Concello obteña mediante cesión os terreos e que suporá deseñar o Beluso do presente e do futuro”.

Inicio

A xénese deste proxecto sitúase no 2010, cando se eliminaron prazas de estacionamento na estrada provincial que vai desde a Rúa Nova ata o parque empresarial, a raíz das medidas de seguridade que esixía a Deputación. Foi entón cando o Concello buscou alternativas para recuperar os aparcadoiros e contactou coa familia Davila, coa que acordou un alugueiro de terreos para unha parcela. Desde aquela emprégase como aparcadoiro, unha solución que se estimaba temporal.

Un momento do acto de sinatura de Concello e familia Davila. Imaxe: Concello.

“Estabamos explorando fórmulas para que o Concello puidese adquirir os terreos mediante unha permuta”, lembran Juncal e Villanueva. Coa aprobación do PXOM abriuse unha nova fórmula, a formalización dun convenio a través do cal o Concello podía anticipar a obtención dos terreos mediante a cesión das persoas propietarias e establecendo condicións de forma regulada. Ese convenio foi o que se asinou esta mañá. “Ten carácter gratuíto, pero o Concello comprométese a aprobar os instrumentos de xestión urbanística nun prazo máximo dun ano e medio, para permitir o desenvolvemento urbanístico do centro de Beluso”, sinalan desde as dependencias municipais.

O edil de Urbanismo, Martín Villanueva e o alcalde, Félix Juncal, durante a sinatura.

“A primeira pedra dese futuro Beluso que vén”

Para Juncal e Villanueva esta sinatura simboliza “a primeira pedra dese futuro Beluso que vén, con enormes oportunidades e que transformará a zona con criterios de mobilidade, accesibilidade e calidade urbana”.

Desde o Concello sinalan que de forma inminente acometerán unha mellora integral do aparcadoiro, así como o inicio da redacción dos proxectos aos que fai referencia o convenio. “Unha vez se edifique este solo, permitirá que exista unha bolsa de vivendas protexidas, para facilitar o acceso á vivenda”, explican. Na mesma liña, agradecen a colaboración e confianza da familia Davila, especialmente na figura de Aureliano Davila.