O pleno aprobou esta mañá a proposta da modificación do proxecto de ampliación da Biblioteca Municipal Torrente Ballester cos votos a favor de BNG e ACB, a abstención do PP e en contra do PSOE. Trátase dunha actualización e revisión do documento por parte do equipo técnico redactor, despois de que a empresa adxudicataria renunciase á execución da obra polo incremento dos custes dos materiais de produción. Xa en novembro, o pleno acordou resolver por mutuo acordo ese contrato administrativo.

A actualización do proxecto fai ascender o seu custo a un total de 1.108.321,90 euros, un incremento de case 192.000 euros. Agora, a nova documentación será enviada á Deputación de Pontevedra para que poida valorala e dar o visto e prace, xa que esta obra está financiada cos fondos do Plan Reacpon e do Plan Concellos 2022. Ademais, tal e como explicou esta mañá o alcalde, Félix Juncal, o Concello comprométese a financiar o incremento do proxecto con fondos propios ou axudas doutros organismos públicos. Este segundo punto tivo que aprobarse nunha segunda sesión extraordinaria celebrada a continuación, tal e como advertiu o secretario.

Durante a sesión, a voceira do PP, Elena Estévez, aludiu a que esta se convocase con poucos días e sen aviso previo aos concelleiros e concelleiras. Tamén preguntou pola posibilidade de que “se puidese incrementar de xeito proporcional a parte achegada entre as dúas administracións”.

O voceiro do PSOE, José Vilas, apuntou a que “necesitariamos contar cun informe da arquitecta municipal, onde se indique as modificacións”. Juncal indicou que ao longo do expediente de contratación xa se farán os informes pertinentes por parte dos técnicos municipais.

Este proxecto pretende adaptar a Biblioteca Municipal Torrente Ballester ao século XXI nos seus usos e servizos, resolvendo tamén problemáticas a nivel estrutural do edificio e cunha especial atención á mellora da accesibilidade e seguridade e á eficiencia enerxética.