O Concello volve poñer en marcha este verán as rutas “Sabor e mar”, coas que se pretende achegar os recunchos naturais, culturais e gastronómicos da vila. Esta combinación experimentou unha boaacollidadurante o verán pasado, polo que se optou por repetir a fórmula. As rutas comezarán os sábados 18 e 25 de xuño e 2 de xullo, mentres que no resto do verán continuarán sendo os venres.

Cun custe de seis euros por persoa, as camiñadas comezarán ás 10.00 horas e inclúen unha ruta guiada por diversos recunchos da vila así como a degustación dunha tapa mariñeira elaborada por unha cociñeira profesional na Praza de Abastos. Para participar é preciso inscribirse previamente no correo turismo@concellodebueu.gal, no teléfono 986390029 (ext.5) ou a través do formulario dispoñible na web municipal.

“É importante que coñezamos os lugares máis destacados da cultura da nosa vila e os produtos que nos trae o mar”, explica a concelleira de Promoción Económica e Turismo, Silvia Carballo. Por ese motivo, desde o goberno local sinalan a súa aposta polo turismo sostible e de natureza, co obxectivo de coñecer o patrimonio natural e inmaterial da contorna, tanto para a veciñanza como para as persoas visitantes.