A bueuesa Raquel Álvarez recibiu esta tarde un dos galardóns dos Premios Sofía Novoa, que a Deputación de Pontevedra e a Universidade de Vigo entregan para recoñecer a integración da perspectiva de xénero nos Traballos de Fin de Grao e Fin de Máster.

Álvarez recibiu este galardón na modalidade de Traballos de Fin de Grao por “O traballo por proxectos e o álbum ilustrado para promover a igualdade de xénero en educación infantil”, unha intervención baseada na simbiose destes instrumentos e xéneros como metodoloxía idónea para abordar as cuestións de xénero e promover a igualdade en 5º de Educación Infantil.

En total distinguíronse seis traballos e a presidenta da institución provincial, Carmela Silva, reivindicou a perspectiva de xénero no ámbito académico como un instrumento “fundamental para frear as desigualdades que sofren as mulleres”. Neste sentido, a presidenta lembrou a necesidade de “aumentar a porcentaxe de alumnas nas carreiras STEAM, onde seguen sendo minoría”.

Con estes premios, a Deputación tamén recoñece e visibiliza a figura histórica de Sofía Novoa, unha muller silenciada e esquecida nos libros, pedagoga cunha gran cultura e que loitou para que as mulleres ocupasen espazos públicos.