O Festival Internacional de Cinema de Bueu, que se celebrará do 11 ao 24 de setembro na vila, vén de abrir a súa tenda en liña así como a venda de entradas e abonos para esta agardada cita cinematográfica.

Desde esta mañá xa se poden adquirir as entradas para o festival a diferentes prezos. O abono para a Sección Oficial ten un custo de doce euros e dará acceso ás cinco sesións de proxeccións, que terán lugar do luns 12 ao venres 16, coa posibilidade de seleccionar o horario das 19 ou 21 horas. Tamén se poden mercar os boletos individuais, cun prezo de tres euros, dispoñibles para outras seccións como Descubertas, Galicia R ou España.

A través desta ferramenta pódese conseguir a entrada para outras actividades como a gravación do programa de radio Carne Cruda, cun prezo de cinco euros ou a proxección de “Zerkalo”, por tres euros. Para a I Xornada Cinematográfica, que será o sábado 24, o único requisito será reservar praza a través do formulario da web.

Para asistir ao acto inaugural, no que se proxectará as curtas dos obradoiros FICBUEU, será preciso retirar un convite. O mesmo ocorre coa Gala Escolas Galegas, a Sección Curtas en Familia e a Sección Retrospectiva. De balde tamén serán outras actividades como a presentación do Caderno FICBUEU#3 ou o concerto de Tulsa.

As entradas tamén se poderán adquirir de xeito presencial no despacho de billetes do Centro Social do Mar, do 5 ao 10 de setembro en horario de 18.00 a 20.00 horas ou antes de cada actividade e proxección.