“Un alcalde que faí oídos xordos ás peticións da veciñanza e pon unha venda nos ollos para non ver os problemas das parroquias”. Así se referiu o concelleiro do PP, Suso Piedras, á situación que, ao seu xuízo, viven as parroquias de Bueu. Neste sentido, tamén apunta ao caso concreto da pista deportiva de Cela. “Moi próxima ao CEIP A Torre-Cela e á rapazada que estuda alí e ao aparcadoiro dos autobuses”, explica Piedras.

Desde o PP sinalan que xa puxeron en coñecemento do rexedor o “gran número de cristais” que hai no chan do aparcadoiro e na contorna dos colectores. “O goberno local decidiu obviar o problema e non solucionalo”, afirma. Neste sentido, solicita que o Concello requira á empresa de recollida de vidro a limpeza da zona e subliña que as papeleiras da zona “rebordan desde hai tempo, sen que o goberno mande ás brigadas municipais”.

Deste xeito, Piedras cuestionou “a gran desatención de Juncal cara ás parroquias” así como a “súa falta de vontade de escoitar”. “É imprescindible que Bueu teña un goberno que escoite a todos os veciños, sen importar se son da principal rúa da vila ou dunha casa afastada”, conclúe.