O Servicio Provincial de Costas de Pontevedra vén de confirmar a Anduxía que a obra de acceso ao peirao de pasaxeiros, impulsada por Portos de Galicia e que ocupa 80 metros cadrados da praia da Banda do Río, “carece da autorización pertinente” de Costas do Estado. Así o trasladou a Asociación ecoloxista de Bueu durante esta tarde.

Desde Anduxía entenden que esta ocupación da praia “non é autorizable” xa que a ocupación do dominio público só se pode xustificar para aquelas actuacións que pola súa natureza non poidan ter outra ubicación. “Algo que para nada se cumpre neste caso xa que existe firme portuario de sobra na zona colindante para realizar o acceso”, explican.

O colectivo sinala que as xustificacións que se ofrecen no proxecto, impulsado por Portos de Galicia, como evitar o lixo baixo unha posible pasarela ou preservar as prazas de estacionamento “non xustifican en ningún caso a ocupación do dominio público”. “E moito menos se pode dicir que reencher 80 metros cadrados de praia é para a mellora ambiental dos entornos urbanos, como di no proxecto”, conclúen.

Anduxía púxose en contacto co Servicio Provincial de Costas tras denunciar esta semana o recheo de 80 metros cadrados da praia da Banda do Río con cemento.