A asociación ecoloxista de Bueu Anduxía vén de expresar o seu “malestar e sorpresa” pola ocupación de 80 metros cadrados da praia da Banda do Río para a realización do acceso do peirao de pasaxeiros. Unha actuación a cargo de Portos de Galicia e enmarcada dentro das obras de mellora de accesibilidade da rúa Montero Ríos e do porto de pasaxeiros.
Desde o colectivo explican que a información da que dispoñían sinalaba que o acceso ao peirao sería cunha pasarela “en voladizo”, que respectaría a praia. “Porén, comprobamos que o primeiro tramo consiste nun recheo de cemento que lle come 80 metros cadrados ao areal”, sinalan.
Anduxía cualifica este suceso como “absurdo e inxustificado” e manifestan que o primeiro tramo podería transcorrer polo firme actual. “Bastaría con eliminar os escasos dez apartamentos que hai na zona, quedando un espazo amplo para os peóns”, apuntan.
AUTORIZACIÓN A COSTAS
Así, avanzan que se poñerán en contacto coa Delegación Provincial de Costas para coñecer si se expediu autorización para esa ocupación do dominio público.
Noutra liña, Anduxía exprésase sobre a modificación da área colindante ao pino anexo á zona da varada. “Bótase en falta unha ampliación maior da zona axardinada que rodea a árbore para favorecer que chegara máis auga da choiva ao mesmo”, sosteñen.
O colectivo púxose en contacto con Portos de Galicia para advertir de que se tomaran as máximas precaucións para que durante as obras non entrase en contacto o cemento coas raíces da árbore. “Algo que podería ser fatal para o mesmo”, sentencian.