O Peirao de Attilio, no paseo de Pescadoira, acolleu esta mañá unha emotiva homenaxe para reivindicar a memoria das vítimas do Villa de Pitanxo. As familias dos mariñeiros falecidos e o Concello organizaron un acto no que se descubriu unha placa co título “Sempre con nós aínda que sen vós” e na que se inclúe o nome dos falecidos nunha das maiores traxedias do sector marítimo dos últimos anos.
A voceira das familias, María José de Pazo, foi a primeira en intervir nun acto que contou coa presenza das familias, o alcalde, a corporación municipal, un gran número de veciñas e veciños e autoridades como a Subdelegada do Goberno en Pontevedra, Maica Larriba ou o xefe de Servizo de Salvamento Marítimo, Fernando Berride.
![](https://xornaldebueu.com/wp-content/uploads/2023/03/1679151427124-1024x683.jpg)
![](https://xornaldebueu.com/wp-content/uploads/2023/03/1679151427239-1024x682.jpg)
![](https://xornaldebueu.com/wp-content/uploads/2023/03/1679151427296-1024x683.jpg)
![](https://xornaldebueu.com/wp-content/uploads/2023/03/1679151427336-1024x682.jpg)
De Pazo reivindicou que “é necesario respectar a memoria dos falecidos” e recordou que “formaban un equipo, o que se manifesta na solidariedade que desde o primeiro momento une tamén a todas as familias para visibilizar o que aconteceu hai un ano”.
A voceira deu paso a Katia e Lorena Santomé, fillas de Fernando Santomé, o veciño de Bueu que ía a bordo do Villa de Pitanxo. Ambas compartiron palabras nun emotivo discurso no que agradeceron a todas as persoas. “Esta placa é o símbolo do noso recordo, coa que tamén agardamos que sexa unha loita pola xustiza e a verdade“, sinalaron.
![](https://xornaldebueu.com/wp-content/uploads/2023/03/1679151427197-1024x683.jpg)
![](https://xornaldebueu.com/wp-content/uploads/2023/03/1679151427253-1024x683.jpg)
![](https://xornaldebueu.com/wp-content/uploads/2023/03/1679151427310-1024x683.jpg)
![](https://xornaldebueu.com/wp-content/uploads/2023/03/1679151427323-1024x748.jpg)
Mentres integrantes da Banda de Música Artística de Bueu interpretaban “Lela” e “Negra sombra”, realizouse a descuberta da placa por parte do alcalde e da familia de Fernando Santóme. Tras isto, tivo lugar unha emotiva ofrenda floral na que os familiares expresaron o seu cariño polos seus seres queridos.
![](https://xornaldebueu.com/wp-content/uploads/2023/03/1679151427144-1024x683.jpg)
![](https://xornaldebueu.com/wp-content/uploads/2023/03/1679151427212-1024x683.jpg)
![](https://xornaldebueu.com/wp-content/uploads/2023/03/1679151427282-1024x683.jpg)
![](https://xornaldebueu.com/wp-content/uploads/2023/03/1679151427266-1024x683.jpg)
O acto rematou coas palabras do rexedor, Félix Juncal, que quixo poñer en valor o acto. “É un acto pequeno, pero importante e necesario, un momento para recordar pero tamén para o recordo”, explicou, á vez que animou ás familias a “seguir percorrendo o camiño da vida”. Juncal rematou a intervención coa lectura dun poema de Xosé Henrique Rivadulla Corcón.