O Pavillón Municipal Pablo Herbello foi o escenario para primeira feira ‘eMprende’, organizada polo IES Johan Carballeira e Ayuda en Acción. Unha iniciativa que pretende crear un escaparate onde o alumnado de Formación Profesional presentou os prototipos de emprendemento nos que estivo traballando.
Trátase dun proxecto piloto para tecer pontes entre o mundo do ensino e do traballo, convertendo a teoría en práctica. Entre os postos participantes, o alumnado sorprendeu ás persoas asistentes con proxectos relacionados co ocio, a educación, a saúde mental, a estética e imaxe persoal ou o deporte.
Así mesmo, tamén realizaron actividades para conseguir un ‘kit de emprendedor’ como entrevistas teatralizadas, obradoiros para mellorar o currículo ou explicacións de proxectos.
Entre os asistentes estiveron o alcalde, Félix Juncal e a concelleira de Promoción Económica e Turismo, Silvia Carballo. O rexedor destacou no acto inaugural que é “moi ilusionante ver a facilidade dos alumnos e alumnas para explicar os seus proxectos” e lanzoulles ánimos. Pola súa parte, a directora do IES Johan Carballeira, Asun Soñora, manifestou que “é un pracer ver ao alumnado defender os proxectos nos que traballou ao longo destes meses”.
O Concello de Bueu colaborou coa organización da feira, e tamén participou coa
colocación dun posto no que se puxeron en valor algunhas das liñas estratéxicas nas que se están traballando desde a institución municipal, como a aposta pola divulgación
medioambiental ou a compostaxe individual e colectiva.