O deputado do BNG no Parlamento Galego, Paulo Ríos, acompañado de membros do BNG de Bueu, anunciou esta mañá diante do Centro de Saúde de Bueu que veñen de rexistrar unha iniciativa no Parlamento Galego para que a Xunta de Galicia repoña “canto antes” o servizo de pediatría en Bueu.

“Xa van quince días que as crianzas de Bueu están sen servizo de pediatría e vemos como a Xunta, lonxe de atender ás necesidades, pon parches, facendo que o persoal faga un sobresforzo”, explicou.

Desde o BNG aluden tamén á falta de planificación por parte da Xunta. “Unha das baixas é por maternidade, polo que se podería ter planificado e contar cun relevo“, afirmaron, á vez que criticaron a ausencia de alternativas para as familias afectadas. “A Xunta segue na política de canto peor para a sanidade pública, mellor para a sanidade privada“, sinalou.

SITUACIÓN ACTUAL

Ríos tamén recordou a situación que vive a día de hoxe a atención pediátrica na vila ante a falta das dúas pediatras asinadas, que están de baixa. “A Xunta pretende resolvelo con parches, en forma de atención da pediatría por parte do persoal de enfermería ou persoal médico non especializado na saúde e nas doenzas das crianzas”, afirmou.

“A sanidade pública debe blindarse e, sobre todo, na atención sanitaria aos nenos e nenas, que deben ser tratados por persoal específico”, conclúen.