“E seguiremos facéndoo”. Esa foi a resposta de Bea Sotelo ante a homenaxe que recibiu esta mañá no Salón de Plenos polo seu labor na visibilidade do traballo das mulleres na cociña. A cociñeira foi a encargada de abrir esta mañá as “Xornadas Gastronómicas en Feminino”, coas que o Concello, Fecimo e Asociación de Hostalaría queren reivindicar o papel das mulleres cociñeiras este 8M.
Sotelo comezou recordando o seus inicios nos fogóns do restaurante A Centoleira e agradeceu a iniciativa. “É importante destacar o labor das mulleres non só na cociña, senón en todos os ámbitos”, afirmou Sotelo, que agora se dedica á cociña e á formación neste ámbito.
Para simbolizar o inicio da ruta gastronómica, Sotelo e o seu axudante realizaron en directo dous petiscos. Para o primeiro deles empregou un produto local, un xurelo comprado na propia Praza de Abastos da vila, e que marinou e acompañou con encurtidos. O punto doce chegou na segunda “tapa”, unha tarta de améndoa con esferas de mandarina e praliné de froitos secos.
No acto tamén participaron a concelleira de Promoción Económica e Turismo, Silvia Carballo, e a concelleira de Igualdade, Ana Isabel Otero. Amabas coincidiron en sinalar a importancia deste proxecto e en reivindicar o papel da muller en todos os ámbitos. O rexedor, Félix Juncal, quixo recordar a “todas as mulleres, ás nosas nais e avoas, que nos transmitiron unha forma de ser e de sentir que hoxe reivindicamos”.
Pola súa parte, desde a Asociación de Hostalaría, Antonio Rosales, lembrou como xurdiu a iniciativa, coa meta de visibilizar ás mulleres cociñeiras, que forman parte do 80% das cociñas. “Era de xustiza poñer diante ás mulleres da hostalaría de Bueu”, concluíu. O acto pechouse coa entrega, por parte do Concello, dunha figura de Rosalía de Castro á homenaxeada, Beatriz Sotelo.
Os locais que participan nesta edición son Buena Vibra, Casa Benito, Noite Tapas, O
Ratiño Pequeno, La Zarzamora, Pyramis, Vinoteca A Cepa, A Centoleira, Esmorga,
Aturuxo Bar, Morriña, Restaurante Casa Quintela e O Farol, que ofrecerán tanto ao
mediodía como á noite tapas a un custe de 3.50 €, nas que expresarán o seu
coñecemento da cociña de Bea Sotelo.