O pesqueiro ‘Cacheria Segundo’ chocou o 23 de decembro de 2020 contra unha batea cando regresaba a Bueu “por falta de vixilancia eficaz da navegación en todo momento” por parte do patrón á hora de “navegar co piloto automático conectado nunha zona interior da ría, próxima ao porto e con obstáculos ao seu arredor”.

Así se conclúe no informe que acaba de publicar a Comisión Permanente de Investigación de Accidentes e Incidentes Marítimos (Ciaim) en relación con este sinistro no que foron rescatados o tres tripulantes que ían a bordo, un deles requiriu hospitalización por hipotermia

Trala colisión contra unha batea no interior da ría de Aldán, o patrón puxo rumbo á próxima praia de Areacova, pero a embarcación anegouse rapidamente por unha vía de auga provocada polo choque contra a batea, polo que se afundiu antes de chegar ao areal.

Durante o traxecto, o patrón chamou por teléfono a un coñecido para que avisase ao patrón maior da confraría de Aldán, co obxecto de que este avisase ás embarcacións da zona para que algunha asistise na súa axuda. Non emitiu chamada de auxilio pola canle 16 de VHF nin polo DSC. Ademais, o patrón puxo a funcionar as bombas de achique, “pero a gran cantidade de auga que entraba rapidamente pola proa provocaron o afundimento”.

Ao seu encontro acudiron varias planadoras dedicadas á extracción de navalla, e unha delas foi a que rescatou aos tripulantes e trasladounos a terra. Tres días despois, a embarcación foi reflotada e trasladada ao varadero de Bueu para a súa reparación.

A embarcación non dispuña de equipo AIS (sistema de identificación automática), por tanto, non existen rexistros do pesqueiro durante a súa navegación pola ría de Aldán ata a colisión. “O patrón tratou de desconectar o piloto automático e alterar o rumbo, pero o temón non lle respondeu”, continúa o relato.

RECOMENDACIÓNS

Nas súas recomendacións sobre seguridade, a Ciaim apela ao patrón a manter a vixilancia durante as súas navegacións “en todo momento”, en especial cando navega entre bateas, para o que se aconsella reducir a velocidade “de modo que unha posible colisión non teña consecuencias graves”. Empraza tamén a que os patróns deben extremar a vixilancia na ponte nas aproximacións a porto.