Tralo remate do prazo para o envío de traballos, o Concello de Bueu vén de contabilizar 71 participantes para os Premios Johan Carballeira. Concretamente, as persoas remitiron 53 poemarios e 18 traballos xornalísticos, entre os que se elixirán aos gañadores das categorías de Poesía e Xornalismo.
Desde o departamento de Cultura que dirixe Xosé Leal destacan que estas cifras demostran que o certame bueués, que naceu para homenaxear a Johan Carballeira, constitúe xa todo un referente a nivel galego, que ano tras ano mantén ou mesmo incrementa as cifras de participación.
![](https://xornaldebueu.com/wp-content/uploads/2023/02/1653222313790-1024x683.jpg)
Os traballos serán revisados as vindeiras semanas polo xurado co obxectivo de que as persoas gañadoras sexan seleccionadas entre finais de abril e comezos de maio. Os galardóns están dotados con 1.500 euros en cada categoría, ademais da publicación do poemario gañador da man de Xerais.
Na anterior edición, Miguel Sande recibiu o premio de poesía co poemario “Brinde e desespero”, mentres que na categoría de xornalismo, o galardón recaeu na reportaxe “A saúde mental en Galicia, en bragas”, asinada pola escritora Antía Yáñez e publicada na revista Luzes.