A vila tamén renovou este recoñecemento para o Sendeiro de Cabo Udra
Os galardóns “Sendeiros Azuis”, concedidos anualmente pola ADEAC, empréganse para recoñecer o gran valor ambiental das rutas de sendeirismo próximas ás praias. Este 2023 Bueu conseguiu renovar o distintivo azul para o Sendeiro de Cabo Udra e logrouno por primeira vez para o Sendeiro do Litoral, que se inicia na praia de Portomaior e finaliza na de Lagos.
O alcalde da vila, Félix Juncal, e a concelleira de Promoción Económica e Turismo, Silvia Carballo, mostraron onte a súa satisfacción ante a nova destes dous galardóns. “Premian a nosa aposta pola difusión da natureza de forma respectuosa e con actividades dinamizadoras”, explican.
O logro do recoñecemento para o Sendeiro do Litoral vén trala incorporación da Bandeira Azul ao areal da Banda do Río o pasado verán. “Acadalo supón unha oportunidade de proxección a nivel internacional e tamén un agasallo para que a nosa veciñanza siga coñecendo a vila e os seus encantos”, sinala Carballo.
A ruta do Sendeiro do Litoral percorre numerosos elementos que definen a esencia de vila mariñeira de Bueu así como o seu pasado industrial. As factorías de salgadura, o Museo Massó ou o Estaleiro de Purro son algúns dos puntos que se inclúen así como a paisaxe natural de bosques e rochas.