A voceira, Elena Estévez, denuncia “novas carencias de limpeza de edificios municipais”

O grupo municipal do PP de Bueu volve poñer o foco na limpeza das infraestruturas municipais. Nesta ocasión, a voceira, Elena Estévez, fai mención á situación do Centro Social do Mar. “Hai xa 20 días que o Concello non limpa determinadas partes, en especial a zona empregada para oficinas pola asociación de xubilados“, declarou. Tamén relacionou a causa do problema coa “ausencia de traballadores no servizo de limpeza e á falta de busca de alternativas por parte de Juncal”.

A popular sinala que as persoas que empregan este espazo levan meses solicitando ao goberno o arranxo das filtracións de auga. “O executivo municipal decide facer oídos xordos, a pesar de saber que estes problemas poden causar males maiores, prefiren instalarse na desidia”, afirma. Así, desde o PP solicitan unha reparación da cuberta na maior brevidade. “É imprescindible que Juncal comece a exercer as competencias que lle corresponden ao Concello e abandone a política de slogans, ‘hashtags’ e fotos bonitas”, apunta.

Desde o PP opinan que a limpeza das infraestruturas municipais “segue a ser un asunto esquecido por parte do goberno local” e cualifican de “vergoñentas” e “inxustificables” as políticas executadas. “Desde hai meses persiste na falta de limpeza por sistema e non actuar como debe facelo unha administración pública”, conclúen.