A voceira do Partido Popular de Bueu, Elena Estévez, vén de denunciar a situación da Policía Local e que cualifica de “dramática” pola falta de medios e efectivos así como de limpeza na súa sede. Estévez apunta a que o tratamento por parte do goberno municipal é obxecto de queixas por parte tamén da veciñanza e é froito “do desdén e a pasividade coa que BNG e ACB tratan este servizo básico”.

A popular sinala que a situación é “totalmente degradante para as persoas traballadoras” e refírese á falta de limpeza nas instalacións, ao igual que xa denunciou noutros espazos como a Casa da Música Manuel Omil. “Débese á falta de rigor e planificación por parte dun (des)goberno instalado na apatía e na falta de ideas”, explica.

Neste sentido, desde o PP reclaman que se realicen diferentes obras para acondicionar as instalacións como vestiarios e baños para homes e mulleres. “Esixímoslle a Félix Juncal e Julio Villanueva, que xa estarán a traballar nos Orzamentos para o 2023, que chegarán unha vez máis fóra de prazo, que inclúan as partidas presupostarias necesarias”, indican. Así, tamén considera “vergoñento” que policías se vean na obriga de compartir chalecos. “Deberían ter cada un a súa indumentaria propia”, afirma.

Por último, a voceira pronunciouse sobre a falta de efectivos da Policía Local. “Non nos cansaremos de seguir poñendo o foco sobre a necesidade de que se cubran as prazas vacantes, unha oferta de emprego obrigada para garantir a seguridade da veciñanza de Bueu” e conclúe que “o alcalde, unha vez máis, se dedica a mirar cara ao outro lado”.