O 16º Festival Internacional de Cinema de Bueu celebrarase do 9 ao 23 de setembro do 2023

O FICBUEU vén de abrir o prazo de presentación de obras para a 16ª edición do festival, que se desenvolverá entre o 9 e o 23 de setembro do 2023. A recepción de curtametraxes prolongarase ata o 15 de marzo ás 15.00 horas e as bases contemplan cinco seccións competitivas, seguindo a liña da anterior edición do certame.

As pezas cinematográficas deberán enviarse a través da plataforma Shortfilmdepot cunha taxa de inscrición de dous euros. Poderán presentarse traballos de calquera xénero estreados a partir do 1 de xaneiro do 2022, cunha duración máxima de 30 minutos. As obras seleccionadas daranse a coñecer en xuño e optarán a máis de 5.500 euros en premios. A convocatoria para os centros educativos galegos está previsto que se publique no mes de maio.

Os traballos presentados competirán por entrar nas seccións: Oficial, España, Galicia, Descubertas e Escolas Internacionais, conformando gran parte da programación do festival. O FICBUEU persegue contribuír á difusión cinematográfica non só coa promoción das mellores curtametraxes, senón tamén levando a cabo actividades máis alá do evento.