O SonRías Baixas ten posibilidades de alzarse por terceiro ano consecutivo cun galardón dos Iberian Festival Awards, uns premios que recoñecen o traballo da industria de festivais en España e Portugal. O festival bueués está nominado este ano en tres categorías, algunhas tan relevantes como a de Mellor Festival de Mediano Formato.
O SonRías opta tamén a conseguir o galardón de Mellor Actuación en Directo de artistas de España e Portugal polo concerto das Tanxugueiras que tivo lugar o derradeiro día do evento e no que recibiron o Sinxelo de Ouro por “Terra”. As candidaturas complétanse coa categoría de Mellor Fotografía de Festival polo traballo fotográfico realizado por Rocío Cibes na súa cobertura do SonRías Baixas.
O festival recibiu na última edición destes premios o galardón á Mellor Estratexia de Comunicación e Marketing, logo de que no 2020 o codirector do evento e xerente de PlayPlan, Jordi Lauren, gañara o Premio á Excelencia. Os gañadores desta edición daranse a coñecer o vindeiro 15 de febreiro e o público xa pode votar a través da plataforma de votación.