O grupo municipal do Partido Popular levará ao pleno de decembro unha moción que insta ao goberno local a redactar un proxecto para a mellora da antiga escola unitaria do Cabalo. Os populares solicitan tamén que se presente nalgunhas das liñas de financiamento que ofrecen a Xunta de Galicia ou a Deputación de Pontevedra.

Desde o PP de Bueu indican que a escola unitaria do Cabalo forma parte dos bens de titularidade do Concello e que é empregada pola veciñanza para diversas actividades desde hai varios anos. A voceira, Elena Estévez, sostén que “a administración municipal non realizou obras de adaptación e mellora do espazo” desde que o centro se deixou de empregar como ensino infantil e “a pesar de que se emprega con diferentes fins”.

Estévez explica que administracións públicas como a Xunta e Deputación ofrecen posibilidades para que o Concello obteña fondos para mellorar este tipo de infraestruturas e o seu uso por parte da veciñanza e dos colectivos. “Faise imprescindible que o goberno local asuma a iniciativa de remodelar este espazo, mediante a redacción dun proxecto e a concorrencia ás liñas de axudas”, conclúe.