Informar, previr e concienciar sobre a diabetes. Eses son os obxectivos da mesa informativa que se organizou onte desde o centro de saúde da vila, en colaboración co Concello, e con motivo do Día Mundial da Diabetes. Na entrada do centro sanitario, os pacientes puideron resolver todas as súas dúbidas arredor desta enfermidade metabólica e crónica.
Como principal novidade, as persoas non diabéticas puideron coñecer a probabilidade que terían de ser diabéticos nos vindeiros dez anos. Tal e como explica Benito Durán, enfermeiro residente, fíxose a través do test Findrisc e no que participaron 31 persoas. Mediante oito preguntas sobre o estilo de vida do paciente, os antecedentes familiares ou os parámetros antropométricos, obtense unha puntuación que equivale ao porcentaxe de desenvolver diabetes nos próximos dez anos.
![](https://xornaldebueu.com/wp-content/uploads/2022/11/WhatsApp-Image-2022-11-14-at-18.16.22-1024x827.jpeg)
Agora, os datos serán analizados con fins educativos e quedarán rexistrados na unidade do docente do centro de saúde. Así, estarán dispoñibles por se nalgún momento se abre un estudo sobre a diabetes na vila.
A prevención, o mellor tratamento
Ademais de resolver dúbidas, a iniciativa centrouse na prevención e concienciación sobre o que é e o que supón esta enfermidade. Algunhas das recomendacións pasan por realizar exercicio físico, levar unha alimentación saudable e evitar o consumo de tabaco ou alcol.
![](https://xornaldebueu.com/wp-content/uploads/2022/11/WhatsApp-Image-2022-11-14-at-18.16.21-1024x977.jpeg)
No caso dos pacientes diabéticos, tal e como indican desde o centro sanitario, é preciso que realicen actividades de autocontrol do peso e dos pés así como da medición da glucosa en sangue. Esta mesa, na que estiveron presentes a médica residente Cátia e os enfermeiros residentes Pablo e Benito, enmárcase dentro do traballo das intervencións comunitarias.