Que leva a Juan Gómez-Jurado a incluír Bueu dentro da súa xira de presentación en cidades como Madrid ou Barcelona? A resposta estivo no acto de onte. Era unha das citas literarias máis agardadas da tempada e non houbo decepcións. Juan Gómez-Jurado chegou a Bueu para presentar a súa derradeira novela, “Todo arde”, nun acto organizado por Libraría Miranda e no que estivo acompañado polo seu amigo e tamén escritor, Manel Loureiro.

Cun característico humor, ambos converteron a presentación nun dinámico encontro co público no que tamén reflexionaron sobre diversos aspectos da súa derradeira novela. O máis importante foi a construción dos personaxes, con especial fincapé en Mari Paz Celeiro, nada en Vilariño (Ourense). Así, Juan Gómez-Jurado narrou a experiencia de incluír frases en galego para este personaxe, así como o establecemento da súa personalidade.

A presentación encheu o Centro Social do Mar e xa levaba máis de catro días co cartel de “aforo completo”. Precisamente, Bueu fíxose un oco entre a xira de Gómez-Jurado polas cidades do país. “Seguirei vindo a Bueu”, confesou ao final do acto. Así, tamén fixo unha excepción e firmou libros ao rematar, que previamente as persoas asistentes tiveron que deixar aos responsables de Libraría Miranda e que hoxe terán que ir buscar ao establecemento.