O Salón de Plenos acolleu onte a sesión ordinaria de novembro, onde a corporación mostrou o seu respaldo unánime á frota pesqueira galega ante o novo regulamento aprobado pola Comisión Europea. Todos os grupos políticos votaron a favor desta moción, que foi presentada polo BNG.

O voceiro nacionalista, Xosé Leal, foi o encargado de ler o texto, onde se facía referencia ao peche de 87 áreas de pesca e as súas consecuencias para os buques con artes de fondo. “É un novo golpe que se engade ás limitacións de TACs e cotas de pesca ou ao impacto o Brexit”, sinalou Leal, que fixo fincapé en que o acordo “contou con informes científicos insuficientes e sen buscar alternativas co sector”. Tamén apuntou á ameaza que supón este novo regulamento para os barcos galegos e os postos de traballo, con repercusións en Bueu e a comarca do Morrazo.

Así, a moción insta á Xunta a convocar o Consello Galego de Pesca para organizar unha resposta unitaria e defender a frota galega. Tamén reclama ao goberno español tomar todas as medidas posibles para a anulación do regulamento, así como o inicio do procedemento xudicial.

A voceira do PP, Elena Estévez, anunciou o grupo a favor do seu grupo. “Aínda que haxa aspectos cos que non estamos completamente de acordo, é preciso axudar ao sector cun acordo unánime”, explicou. Desde ACB, Julio Villanueva, reafirmou que “é fundamental defender a pesca galega ante esta nova normativa”.

Cheminea de Massó

O pleno debateu tamén a moción presentada polo PP e na que se instaba ao goberno local a realizar un estudo do estado da cheminea Massó, para adoptar as medidas necesarias e garantir a súa integridade. A voceira popular mencionou que a parte inferior da estrutura “está deteriorada” e que a moción “obedece ao sentir noso e tamén da veciñanza que está preocupada polo estado”.

Tras isto tomou a palabra o edil de Urbanismo, Martín Villanueva, que explicou que este ben “é de titularidade privada, aínda que estea nun espazo público, e non podemos proceder a actuar sobre ela”. Villanueva aludiu a que existe un erro no catálogo que non especificaba a propiedade.

O voceiro do PSOE, José Manuel Vilas, avanzou que aínda que non fora un ben municipal “temos que instar á propiedade a tomar as medidas oportunas”. Noutra banda, Julio Villanueva, anunciou o voto en contra de ACB. “É un símbolo fascista dos maiores caciques que houbo en Bueu que non merecía estar aí”, mencionou.

Ante isto, Estévez pediu ao edil de Urbanismo a modificación do erro no catálogo e “tomar as medidas para a quen lle corresponda faga o que teña que facer”. A continuación interveu o alcalde, Félix Juncal, que recordou como foi instalación da cheminea no 2005. “O PP negociou un convenio que prexudica ao Concello, cunha redución de metros cadrados e que permitiu cortar a cheminea pola base, poñendo en risco a súa estabilidade”, confirmou.

Juncal avanzou que lle trasladará ao aparellador esta inquietude polo estado da cheminea. “De considerar algún perigo, requirirá á propiedade para o seu estudo”, concluíu. Así, a moción non prosperou xa que co contou cos votos a favor de PP e PSOE e en contra de BNG e ACB.

Para rematar, o PSOE propuxo unha moción por vía de urxencia sobre o estado da sanidade pero que, finalmente, levará á próxima sesión plenaria. Onte tamén tivo lugar a aprobación por unanimidade da Conta Xeral do Concello do ano 2021, un trámite administrativo que se debe cumprir anualmente.