Tras case máis dun ano en funcionamento, Bueu acolle este sábado a presentación pública do medio de información dixital Xornal de Bueu. Será nun acto ás 12.00 horas no Centro Social do Mar e onde a responsable do proxecto, a xornalista bueuesa Carmen García, explicará en profundidade a iniciativa.
Xornal de Bueu naceu como un traballo de fin de grao de Xornalismo e estivo titorizado por Xurxo Salgado, director de Galicia Confidencial. Trala súa defensa, Xornal de Bueu continuou medrando ata converterse nun medio dixital de referencia para a sociedade bueuesa.
Na presentación, Carmen García narrará a orixe de Xornal de Bueu, os seus obxectivos e os primeiros resultados. Ademais de dar conta do traballo feito ata ese mesmo día, analizará algún dos aspectos claves do medio como a súa estratexia en redes sociais e o emprego do galego. Neste acto, a veciñanza poderá coñecer dunha maneira máis próxima o proxecto e tamén resolver todas aquelas dúbidas que teñan.
Xornal de Bueu vén de iniciar unha nova etapa da man de Galicia Confidencial, o primeiro diario electrónico en galego e un dos que acumula máis audiencia na rede. Ademais de ofrecer soporte técnico cunha renovada web, a imaxe de Xornal de Bueu tamén mudou camiño da súa profesionalización. Todas estas cuestións tamén serán tratadas no acto.