O prazo de solicitudes para os postos xa está aberto

Bueu acollerá o vindeiro domingo 27 de novembro unha nova edición do mercado ecolóxico e artesanal da vila na carpa dos Xardíns Urbano Lugrís-AsLagoas. O Concello xa traballa na súa organización e desde a concellaría de Promoción Económica e Turismo, que dirixe Silvia Carballo, indican que o prazo de solicitude dos postos xa está aberto. As persoas e entidades interesadas poderán solicitalos ata o 28 de outubro

O mercado, que xa suma máis de dez anos de historia, naceu co obxectivo de diversificar e consolidar a economía locala través dun consumo responsable e unha produción sustentable. Ademais, persegue contribuír á onservación da cultura rural e tradicional así como das formas de uso e xestión dos recursos naturais.

O evento albergará un máximo de trinta postos que poderán solicitar produtores de sectores de alimentación, artesanía, comercio xusto, saúde e benestar, tecidos e calzados, turismo e gastronómicos. As bases están publicadas na web municipal e as solicitudes poden presentarse a través do Rexistro Xeral ou da sede electrónica.

“Este proxecto demostra o compromiso do goberno bueués polos produtos locais e a concienciación medioambiental na sociedade”, indican desde o goberno local. Avanzan tamén que haberá unha ampla e variada programación conactividades paralelas para gozar dun día en familia.