Dous veciños bueueses foron identificados pola Garda Civil, un deles detido e o outro investigado penalmente, como presuntos autores dun delito de espionaxe industrial tras supostamente instalar cámaras nunha empresa da comarca do Morrazo.

A estas dúas persoas, ás que se lles vincula tamén cun delito contra a propiedade industrial, acúsaselles de colocar dúas cámaras de vídeo vixilancia no interior da nave dunha empresa dedicada á elaboración de cebos para a pesca, coa presunta intención de revelar o segredo comercial en relación coa fabricación do cebo.

A investigación comezou cando o propietario da compañía detectou unha das cámaras e o denunciou ante a Garda Civil. Cando os axentes se presentaron na empresa localizaron unha segunda cámara.

Os efectivos detiveron in fraganti no interior da empresa a un dos investigados cando ía cambiar a batería dunha das cámaras que se apagou. Trátase dun veciño de Bueu con numerosos antecedentes policiais, segundo indicou a Benemérita nun comunicado. Tras iso, identificouse a outra persoa, tamén da vila, encargada de visionar por control remoto as imaxes a través do seu teléfono móbil.

As dilixencias instruídas entregáronse no Xulgado de Instrución de garda de Marín, onde deberán comparecer os presuntos autores cando sexan requiridos pola autoridade xudicial.