InicioMEDIO AMBIENTEUnha ruta polo río Nocedo para coñecer a cultura da auga

Unha ruta polo río Nocedo para coñecer a cultura da auga

Publicado o

Fontes, lavadoiros, muíños, lagos…A auga dos ríos da vila tivo infinidade de usos ao longo da historia. Descubrilos á veciñanza e poñelos en valor é o obxectivo dunha das derradeiras actividades difundidas pola Asociación por Beluso (Asbel). Da man do veciño Manuel Otero, os participantes puideron descubrir o pasado sábado a historia do río Nocedo así como os usos que os antepasados facían da auga.

Un momento da ruta polo río Nocedo que se celebrou o pasado sábado.

A ruta, que partiu do pavillón de Beluso e contou coa participación de arredor de 20 persoas, fixo a súa primeira parada no lavadoiro de Ouril, para exemplificar o significado destes lugares. Ademais de servir para a hixiene do fogar, ata fai 40 anos foron tamén un importante punto de encontro e socialización.

Tal e como relata Otero, o segundo punto no que se detiveron foi na contorna da capela de Sanamedio. Alí narrou, baixo o exemplo da Fonte do Santo, o emprego relixioso da auga, pois eran moitos os que lle atribuían propiedades curativas sobre o aparato dixestivo. “Antigamente a auga desa fonte non só se empregaba para as persoas, senón tamén para os animais do fogar, como vacas ou ovellas”, explica.

O grupo participante nos arredores de Sanamedio.

O camiño proseguiu ata o nacemento do río Nocedo, pasando a zona de Forqueiros e coñecendo espazos como a Fonte dos Ladróns. Foi nese punto cando se empezou a albiscar o relevo dos antigos lagos , como o de Castiñeiras ou o do Ouro, que existían ao paso do río e que conformaban unha rede perfectamente estruturada. “Estaban estratexicamente situados, así como as súas canles”, explica Otero.

Para completar esta ruta pola cultura da auga, os participantes puideron coñecer a historia dos muíños do río Nocedo, os únicos que se poden atopar en Beluso. Aínda que chegou a haber sete, o grupo centrouse en coñecer o muíño de Avical pola súa beleza a nivel arquitectónico. “Tamén foron outro punto de encontro, onde se cantaba e se contaban historias”, sinala.

Para finalizar a ruta, que durou máis de catro horas, os participantes chegaron á desembocadura do Nocedo, en Reventóns, e seguiron o camiño do río Lixo, onde tamén puideron observar o relevo de lagos. Ademais de coñecer o emprego histórico da auga, a actividade perseguiu a súa posta en valor así como a sensibilización da sociedade.

ÚLTIMAS

Meiro prepara o Encontro do Millo Corvo cunha programación “moi diversa”

Meiro acollerá do 14 ao 16 de abril a súa festa gastronómica por excelencia,...

O PP denuncia a “falta de limpeza” na contorna do CEIP A Torre-Cela

"Un alcalde que faí oídos xordos ás peticións da veciñanza e pon unha venda...

A transformación do antigo cemiterio cinco décadas despois

O antigo cemiterio de Bueu, na contorna da Igrexa de San Martiño e clausurado...

A obra de acceso ao peirao de pasaxeiros, co recheo de cemento na praia, “carece de permiso” de Costas

O Servicio Provincial de Costas de Pontevedra vén de confirmar a Anduxía que a...