Co inicio de setembro chega unha das citas gastronómicas máis agardadas na vila, a Ruta das Tapas Cinco Estrelas. Esta iniciativa, organizada polo Concello, o FICBUEU e a Asociación de Hostalaría da vila, celebra a súa sétima edición do 9 e ao 18 de setembro. O obxectivo, porén, segue a ser o mesmo: unir o cinema coa gastronomía durante a semana do festival.

Este ano serán trece os establecementos os que ofrezan elaboracións inspiradas en cinema, que se poderán degustar tanto ao mediodía como pola noite, nos horarios estipulados por cada local. Concretamente, participan: A Cepa, Buena Vibra, Casa Quintela, Casa Videira, Esmorga, Morriña, Noite Tapas, O Farol, O Ratiño Pequeno, Pyramis, Secretos del Mar, Volver e Casa Benito. “Teremos a posibilidade de coñecer un ano máis a diversidade da nosa hostalaría, que é das mellores”, indica a concelleira de Promoción Económica e Turismo, Silvia Carballo.

Os petiscos terán un custe de 2.50 euros e a clientela terá a posibilidade de gañar un dos tres vales de 50 euros para consumir na hostalaría. Para participar neste sorteo, as persoas deberán reunir cinco selos (un por tapa) e entregar o papel na Oficina de Turismo de Bueu.