As primeiras análises sinalaron que o corpo sólido achado no Monte Ermelo non se atopaba rexistrado en ningunha base de datos internacional

O Monte Ermelo, considerado xunto á aldea de igual nome como cerne do Morrazo, suma a partir de agora un novo fito histórico: o descubrimento dun mineralnunca antes rexistrado no mundo. O novo mineral, que recibe o nome de “ermeloíta“, foi recollido en campo por José Carlos Rodríguez Vázquez,Moisés Núñeze Manuel Cerviño e vén de ser identificada polo persoal técnico de investigación da Universidade de Santiago de Compostela (USC).

A ermeloíta pasará aos libros de xeoloxía como o cuarto mineral descuberto en Galicia.“Na comunidade descubríronse tres minerais ao longo da historia: a morenosita, a cervantita e a bolivarita, todos eles achados na metade do século XIX”, explica Óscar Lantes, responsable da Unidade de Arqueometría e Caracterización de Materiais da USC. Deste xeito, a ermeloíta é o primeiro material descuberto en terra galega no século XXI.

O novo material xa está oficialmente recoñecido pola International Mineralogical Association (IMA) como nova especie, sendo a súa localidade tipo o Monte Ermelo e o exemplar tipo o analizado desde a USC. Precisamente, despois de achalo, o equipo sospeitou que se podía tratar dun novo material e realizou diversas análises con técnicas calorimétricas ou de fluorescencias de raios X, entre outras.

Fito histórico

“Este descubrimento ten repercusións históricas por ser tan poucos os minerais que se descubriron desde Galicia e reforza a importancia das investigaciónsna mineraloxía, en especial no contexto xeopolítico actual coa necesidade de materias primas estratéxicas”, reflexiona Lantes.

Porén, o fragmento atopado é pequeno, polo que aínda non se aventuran a dotalo de posibles aplicacións industriais ou tecnolóxicas. Aínda así, non descartan que a partir deste achado sexa posible identificar esta especie en ambientes similares noutras formacións xeolóxicas no mundo.

Os investigadores sinalan que a ermeloíta, de ton case branco, pasa desapercibido e é facilmente confundible con outros minerais de cores claras. Polo de agora, o exemplar tipo da ermeloíta localizado en Ermelo será exposto no verán do vindeiro ano nunha mostra no Colexio de Fonseca, en Santiago de Compostela. Posteriormente, será depositado de forma permanente no Museo de Historia Natural (MHN) da USC para futuras investigacións.