Do mar á arte hai menos dun paso e así o constata a exposición que se poderá visitar hoxe na Casa do Pombal, a partir das 20.00 horas. Este novo espazo para a expresión artística, situado no número 13 da rúa Caripa, acolle unha mostra do pintor e escultor bueués José Luis Barros, que dedicou toda a súa vida ao mar, tanto como mariño mercante como á pesca de baixura, a bordo dunha gamela.

A exposición, que só se poderá visitar hoxe polo seu carácter temporal, está organizada pola arquitecta bueuesa Lucía Buceta e o artista Dominic Beattie. “José Luis Barros é un artista puro e orixinal e debe ser considerado como tal”, apuntan desde a organización. A obra de Barros caracterízase polo emprego de materiais reciclados, que adoita recoller na praia así como pósteres de propaganda dunha peixería da vila dos que aproveita o seu reverso.

Os cadros do artista compóñense de dúas imaxes que poden estar relacionadas ou ser aleatorias, empregando unha “misteriosa lóxica” para os emparellamentos. Desde a organización sinalan que a sensación da obra establece unha vinculación coa arte pop. “Ningunha imaxe parece máis importante que outra nin a domina”, explican. Nas súas creacións pódense atopar desde barcos, paxaros, espidos modernistas ata escenas do pobo e iconas relixiosas.

A maneira de presentar as imaxes tamén é novidosa, posto que están enmarcadas con paus que forman os foguetes artificiais que anuncian as festas e que atopa polo chan. Os marcos, pola súa parte, están decorados meticulosamente con pequenas cunchas, reforzando a relación co mundo mariñeiro.

A Casa do Pombal ou “Pombal Gallery“, onde será exposta obra, é un antigo pombal convertido nun novo espazo para a arte. Un proxecto que naceu co obxectivo de reivindicar a accesibilidade da arte, así como a súa procedencia desde calquera lugar.