Esta tarde comezou en Bueu coa detención, por parte da Garda Civil, dunha persoa de 24 anos de idade (J.J.G) acusada de cometer varios delitos como roubos e ameazas á veciñanza en diversas ocasións. O arresto tivo lugar a primeira hora da tarde na zona de As Meáns, ao mesmo tempo que se producía unha concentración da veciñanza para dar a coñecer a situación que estaban vivindo e que chegou a cortar o tráfico en varios momentos da estrada PO-551, producindo retencións.

Efectivos da Policía Local e da Garda Civil levaban mobilizados desde ás 13.00 horas no punto para deter a J.J.G, que tiña diversas ordes de arresto. A veciñanza levaba concentrada tamén desde o mediodía para denunciar a súa preocupación pola inseguridade que o individuo estaba a xerar no lugar ao berro de “fóra de Bueu, ladrón” ou “os xitanos non son malos”. Nalgúns momentos, os concentrados chegaron a cortar o tráfico da estrada PO-551, ocasionando retencións en ambas direccións e tendo que ser redirixido o tráfico en dirección á rúa Montero Ríos.

O acusado atopábase no interior do edificio no que vivía e tamén se mobilizaron aos bombeiros. Finalmente, tras máis dunha hora, J.J.G foi detido e trasladado no vehículo da Garda Civil en dirección ao Xulgado de Marín. Tras isto, os veciños, que no momento da detención aplaudiron o arresto, abandonaron o lugar.