Onte tivo lugar unha xuntanza urxente entre a Xunta e os municipios que abastece a conca do Lérez para afrontar o escenario actual, con prealerta por escaseza de auga, así como a situación futura. No encontro participaron a conselleira de Infraestruturas, Ethel Vázquez e a directora de Augas de Galicia, Teresa Gutiérrez. Tamén estivo presente o rexedor bueués, Félix Juncal, xa que a vila abastécese da conca do Lérez.

Vázquez explicou que a situación é“complexa e preocupante”xa que este sistema se abastece, fundamentalmente, do caudal circulante do río e non existen grandes reservas de auga encorada. Só consta o encoro do Pontillón que garantirí un consumo reducido durante un máximo de 14días.

O sistema de abastecemento do Lérez agravouse especialmente ante as elevadas temperaturas rexistradas e a falta prolongada de chuvia. Deste xeito, o caudal do río se reduciu dun xeito abrupto desde inicios de mes, cunha diminución do 73% en menos de 20 días.Os datos medios reflicten que o caudal segue a ser moi baixo, do 1,7 m3/s e de non adoptar medidas podería verse comprometido o subministro.

Coordinación nas medidas

Bueu xa publicou o martes un bando con diferentes medidas e recomendacións, como a limitación nos baldeos e nas duchas dos areais. Na reunión de onte houbo tamén consenso entre os municipios para restrinxir ao máximo o uso innecesario de auga.

Acordouse que é imprescindible suprimir baldeos, regas de xardíns, lavapés e duchas nas praias, enchido de piscinas, lavado de coches, fontes ornamentais e actividades lúdicas que malgasten a auga.